રાવળીયાવદર સરકારી માધ્યમિક શાળામાં નૂતન વર્ષ ૨૦૨૬ ના પ્રથમ દિવસની શરૂઆત શિક્ષણ અને સંસ્કારના સમન્વય સાથે કરવામાં આવી હતી. ગામના જાગૃત અને લોકપ્રિય સરપંચ શ્રી રતનભાઈ સારલા દ્વારા ગામની શાળાની વિશેષ મુલાકાત લેવામાં આવી હતી, જેનો મુખ્ય ઉદ્દેશ્ય વિદ્યાર્થીઓને નવા વર્ષની શુભકામનાઓ પાઠવવાનો અને તેમના શૈક્ષણિક ભવિષ્ય માટે પ્રોત્સાહન પૂરું પાડવાનો હતો.
નૂતન વર્ષના પાવન અવસરે સરપંચશ્રીએ શાળાના તમામ વિદ્યાર્થીઓને રૂબરૂ મળીને નવા વર્ષની હાર્દિક શુભેચ્છાઓ પાઠવી હતી. વિદ્યાર્થીઓમાં શિક્ષણ પ્રત્યે રુચિ વધે તે હેતુસર, શ્રી રતનભાઈ સાલાએ શાળાના દરેક વિદ્યાર્થીને શૈક્ષણિક ભેટ સ્વરૂપે ‘પેન’ અર્પણ કરી હતી. આ નાનકડી પણ અર્થસભર ભેટ મેળવીને વિદ્યાર્થીઓના ચહેરા પર સ્મિત અને અનેરો આનંદ જોવા મળ્યો હતો.
નોંધનીય છે કે, હાલ શાળામાં આર.ટી.પી. (RTP) રાઉન્ડ ૪ અને ૫ ની પરીક્ષાઓ ચાલી રહી છે. સરપંચશ્રીએ પરીક્ષા ખંડની મુલાકાત લીધી હતી અને શૈક્ષણિક કાર્યનું નિરીક્ષણ કર્યું હતું. તેમણે વિદ્યાર્થીઓને પરીક્ષામાં કોઈપણ ડર રાખ્યા વિના, આત્મવિશ્વાસ સાથે પેપર લખવા અને જીવનમાં આગળ વધવા માટે સખત મહેનત કરવા પ્રેરિત કર્યા હતા. તેમણે જણાવ્યું હતું કે શિક્ષણ જ પ્રગતિનું સાચું પગથિયું છે.
આ પ્રસંગે શાળાના આચાર્ય અને શિક્ષકગણે સરપંચશ્રીના આ ઉમદા કાર્ય અને વિદ્યાર્થીઓ પ્રત્યેના તેમના સ્નેહ બદલ તેમનો વિશેષ આભાર માન્યો હતો. સમગ્ર કાર્યક્રમ ખુબ જ પ્રોત્સાહક વાતાવરણમાં સંપન્ન થયો હતો.
